華語通用拼音與國語拼言

感謝邱雅文律師的邀請，做今仔日的司比甲（演講者）。這擺是我第二擺來　貴社演講，實在有夠光榮。邱律師是我台大法律系共班的同學，伊向來對我不止仔照顧，我真幸運，「我交陪攏是關公劉備，無一個是林投竹刺」。

頂擺演講會記得是講兩岸關係，這擺呣知講啥卡好？我想佫想，現在拄仔好總統大選選戰白熱化的時陣，用「選舉語言與台灣俗諺」做題，應該勿會禾黑即著！當然，對選舉我是外行，雖然我定定聽人演講，家己也有咧助講；台灣俗諺我嘛無特別研究，雖然我真有興趣，也言別看過幾本書。不而過，「無二步七仔，毋敢過虎尾溪」，我總是勿會使給邱律師漏氣。

逐家攏知影，咱祖先冒著生命的危險，渡過黑水溝，來到台灣開墾、討趁、生湠，「唐山過台灣，心肝結歸丸」，咱有今仔日，必須要「飲水思源頭，食果子拜樹頭」，感謝咱祖先的勞心苦戰、慘澹經營。不而過，講起來就怨嘆，「台灣人韭菜命」，向來攏被外來政權統治，被人剝削，被人蹍踏，「眾人食，眾人騎，無人疼」，到李登輝做總統了後，才慢慢仔咧出頭天。

過去，中國國民黨政府這個外來政權，厲行黨化教育，禁止台灣話（台語）。可能是一種反彈，在戒嚴時期，到了選舉，黨外人士就用台灣話演講，台腳聽眾呣是人山人海就是徛甲滿滿滿；解嚴了後，連中國國民黨的候選人，包括宋楚瑜等所謂「外省人」在內，為著選票，嘛用台灣話抑是濫台灣話演講。一時之間，台灣話變做上受歡迎的選舉語言。

台灣話真鋛，尤其台灣的俗諺是咱祖先智慧、經驗的結晶，隱含著深邃的道理，大部分佫攏有押韻，給人聽得「心涼脾土開」。比喻「一枝草，一點露」、「打斷手骨顛倒勇」、「做雞著筅，做人著反」、「食緊摃破碗」、「直草無拈，橫草無捻」、「心肝若好，風水免討」、「溜溜鬚鬚，食兩蕊目睭」，真濟真濟。總統大選開戰以來，登輝仙講宋的「𠕇籃仔假燒金」；鴻禧仙比較阿扁甲連的講「少年放尿濺過溪，老人放尿滴著鞋」；阿扁批評中國國民黨「做一湯匙，𠗟歸畚箕」；連的『一直說不可選錯人』，呣通「倩鬼提藥單」，『都非常生動』。

蕌活用台灣俗諺，會使講是民主人士演講的「撇步」。在此，我舉幾個例給逐家做參考：批評中國國民黨這個外來政權，用「人掠厝拆，雞仔鳥仔决甲無半隻」、「乞食趕廟公」、「賊，較惡人」來形容；批評中國國民黨貪污腐化，講「食銅食鐵」、「有毛食到棕簑，無毛食到秤錘」、「石獅食到瀾肚」；批評黑金政治，講「做惡做毒，騎馬硌硞；好心好行，無衫通穿」、「有錢烏龜坐大廳，無錢秀才通人驚」、「選舉無師傅，用錢買著有」、「有錢使鬼會挨磨」；批評司法黑暗，講「有錢判生，無錢判死」、「官司好打，狗屎好食」、「法院是中國國民黨開的」；對統派人士，批評䊵「內神通外鬼」、「吃碗內，說碗外」、「桌頂食飯，桌腳放屎」、「割手肚肉給䊵食，猶嫌臭臊」；對中國的拗蠻壓霸，罵䊵「橫柴夯入灶」、「軟土深掘」、「人無害虎心，虎有傷人意」；甲中國的關係，用「田無溝，水無流」、「一人一家代，公媽隨人裁（拜、祀）」來描寫。

競選的時，逐家攏「講甲喙角全波」。宋的選省長時，講「食人一口，報人一斗」、「人在做，天在看」，果然當選了後，全省走透透，做散財童子。不而過，「龜腳嘛是龜內肉」，其實『宋省長送錢』，祇不過是「開公錢，解私願」、「用別人的拳頭母樁石獅」而已。那知戇直的台灣人，竟然感激歡喜，「貪伊一斗米，失卻半年糧」，家己猶不知影。宋的參選總統，一再講「打拼為台灣」、『天道酬勤』，又佫一再自命清廉，怨嘆無錢，興票案爆發了後，逐家才知影原來宋的是挨錢專家，伊將真濟錢匯去美國，伊的後生宋鎮遠在美國居然有五棟厝，這在先進國家，早就無面佫選落去也，那知伊竟然「死鴨仔硬嘴篦」、「無理講到有理」，莫怪李登輝起性地批宋的「𠕇籃仔假燒金」、「白賊」、「奸巧」、「夭壽」、「賊仔變頭家」。足奇怪的，宋的「龜腳趖出來」了後，明明「菅蓁，勿會做得拐仔」、「屎礐仔板，勿會做得神主牌」，戇直的台灣人，竟然也有真濟人「目睭毛，無漿泔」，「角蜂，看做筍龜」，_珯珯咧信任伊、支持伊。人講「戇百姓」，有影是「戇百姓」！宋的強調伊是改革者，對手講伊「挨錢」、「白賊」，應該是被改革的，家己講是改革者，勿會見勿會笑。宋的嘛講欲斬斷黑金，對手講伊是參黑金「共穿一領褲」的，講欲斬斷黑金，根本是「白賊七仔講古──騙戇人」。

連的講伊是「台灣牛」，骨力、好駛。伊「甘願做牛」，為台灣打拼。伊的對手就反駁講：連的是金牛也是黃牛。伊家伙數百億，來源恰若嘛無彼單純；伊亂開選舉支票，敢有可能實現？李登輝替伊助選，講連蕭老實，勿會曉『作秀』，「天公會疼戇人」。連的揹著黑金包袱，真濟黑金大哥也徛出來㙉伊，對手就講䊵金牛、黑牛、黃牛佮佮做歸椆。連的嘛大聲講欲解決黑金問題，對手就講伊「便所內彈吉他──臭彈」，中國國民黨為著保住政權，不惜與黑金勾結，引狼入室，最後李登輝都無伊法也，連仔用尻川。連的看勢面愈來愈禾黑，煞掠狂，講什麼「其他兩組無論叨一組當選，台灣攏會變做問題國家，會發生大代誌。政治、軍事、外交攏會破壞。」莫怪有人譬相「連蕭配」是「練况話」。

阿扁選台北市長時，一再提醒選民呣通「一個泄尿的換一個滲屎的」，呣通「嬴嬴儌博甲輸輸去」，給人印象非常深刻。彭明敏選總統時，伊講「阿婆仔生囝，誠拼咧」，後來講李登輝「老番顛」，攏引來責備，講伊「喙快」。伊做市長，認真、有魄力、效率懸，對手就造謠講伊「壓霸」。阿扁堅持台灣主權獨立，承認目前國號叫中華民國，結果獨派有寡人講伊變節承認中華民國，而對手就講「阿扁主張台獨，若當選總統，中共就會打過來」。嘛有人「做三腳褲給伊穿」，叫阿扁喝「中華民國萬歲」，伊大聲喝「台灣萬歲」。阿扁喝出「政黨輪替」，這參台灣俗諺「三年一閏，好歹照輪」、「廳頭交椅輪流坐」的意思真倚。李遠哲嘛講『政黨輪替，愈快愈好』。李登輝看呣是勢，煞氣急敗壞，講什麼『政黨輪替，台灣會亂，國家會死』；中國國民黨佫進一步陸續廣告，講什麼『政黨輪替，結果會安定輪替為動亂，繁榮輪替為衰退，和平輪替為戰爭』。按呢畫黑漆白，佫用上腳𤥂的「戰爭牌」、「恐嚇牌」，是呣是預徵中國國民黨已經氣數該盡也咧？

許信良細漢就立志做總統，伊看已經無可能代表民主進步黨參選總統，煞「三文急燒──食一口氣」，離開民進黨，自行參選。伊「四兩𨧤仔無除」，叫是會稠抑是會超過門檻咧，那知氣勢愈來愈禾黑，尤其伊攏講寡「有孔無榫」、「有嘴無𠕇」的批評阿扁，給人感覺「奇中必有緣故」。「一步差，步步差」，伊若留在民進黨，這陣猶原是民進黨的頭兄，伊出走了後，人格破產，路愈行愈狹，實在是「家己捧屎抹面」。

新黨𣿅無人，煞去請李敖出來。李敖這個人有學無德，紅衫穿歸領，「一個喙恰若雞母尻川」咧，什麼話都濺，「六月蚶，開嘴臭」，「夭壽人講夭壽話」，不時講甲勿會聽哩半下。伊連學歷嘛講什麼『勃起台灣，挺進大陸，威而剛世界』，有夠阿里不達。有人講伊是「小丑」，我不敢按呢講，不而過，伊參選總統，確實是另類選舉，猶原咧『笑傲江湖』。

選戰有真濟「腳𤥂步」，比喻「耳語」，耳語「一人傳虛，百人傳實」，非常驚人，有定仔真有效果。向來中國國民黨上蕌透過組織，發動「耳語戰術」。比喻「抹黑」，將對手「白白布，染甲黑」，在無啥是非的台灣社會，抹黑也有真濟人相信。這幾年看起來，台灣第一抹黑高手是啥人？著，是林瑞圖！伊對阿扁烏吐白吐，結局，阿扁「樹身徛得在，毋驚樹尾做風颱」（抑是「樹身徛得正，毋驚樹尾人搖風」）。這擺總統大選，咱看上濟的是「口水戰」，互相指責對方、譬相對手。「三腳貓笑一目狗」、「龜笑鱉無尾，鱉笑龜粗皮」，乎逐家聽甲霧煞煞，看甲花漉漉。其中，中國國民黨連營宋營兄弟鬩牆，口水戰上介激烈，「家己鍄，趁腹內」，「狗咬狗，滿嘴毛」（媒體按呢比喻），「屎桶，愈撈愈臭」，給逐家大開眼界，實在有夠卸世卸眾！

民主選舉，明確徛出來支持特定的候選人是真正常的現象，呣佫，有寡人無家己堅持的理念，參兩方佫攏有交情、有關係，「一爿是溝，一爿是圳」的時，表態支持啥人是真痛苦的代誌，因為無法度做甲「抹璧雙面光」，一定會得罪其中的一方。我堅定支持阿扁甲秀蓮，是為著確保國家安全、維護台海和平、終結黑金政治、建立廉能政府、加速社會改革、增進全民福祉、促成政黨輪替、確立民主政治，完全呣是為著個人的利益，所以真誠心安理得。

選舉，我希望是『高格調的君子之爭』，儘量用『正面選舉』，『負面選舉』往往「教歹囝仔大小」。我認為「選舉是一時的，台灣是永遠的」，咱所最關心的是「台灣按怎顧乎好，呣通給中國吞去」、「台灣按怎求發展，通在國際社會徛起」，有人講台灣人「眾人放尿攪砂勿會做堆」，不而過，在中國不斷的打壓、威嚇之下，台灣命運共同體已然形成，「蕃藷毋驚落土瀾，只求枝葉代代湠」！台灣人若勿愛「一皿魚仔全全頭」、「要給人扶，呣扶人」，會當腳步徙乎在，「尻川勁相倚」，台灣的前途一定是光明燦闌的。「三人共一心，烏土變成金」，「同胞要團結，團結真有力」！

被公認是台灣第一名嘴的李鴻禧教授，伊上蕌活用台灣俗諺演講，流利的台語，動人的音調，美妙的表情，乎聽眾聽甲「嘴仔開開，耳仔磕磕」。「七月半鴨仔──毋知死活」、「乞食背葫蘆──假仙」、「𡧛痀的放屁──彎彎曲曲」、「飼鳥鼠，咬布袋」、「歹瓜厚子，歹人厚言語」、「有毛食到棕蓑，無毛食到秤錘；二腳食到樓梯，四腳食到桌櫃」，伊將台灣俗諺講甲活起來。共款一句話，位鴻禧仙的嘴講出來，無共款就是無共款，奧妙就奧妙在此。當然，聽眾一定要聽有、聽言別，毋則會聽甲「嘴仔開開，耳仔磕磕」。年輕的一輩，恐驚著無即款經驗。中國國民黨政權打壓台灣話的結果，害年輕的一輩煞勿會曉家己的母語。我非常希望少年人認真學台語，台語實在真鋛。

我的序大人是庄腳作穡人，雖然呣言別字，呣佫台灣俗諺言別真濟，我細漢時定定聽著的，譬喻「打虎掠賊也著親兄弟」、「緊紡無好紗，緊嫁無好大家」、「指頭仔咬著逐支痛」、「好駛牛也著工」、「雞屎落土嘛有三寸煙」、「五百人同軍，五百人同賊」、「也著箠，也著糜」、「圓人會扁，扁人會圓」……我攏學起來。有一擺，我厝邊的阿伯教我速唸：「樹頂一隻猴，樹腳一隻狗，狗哮猴也哮，猴走狗也走，毋知是狗驚猴也是猴驚狗。」嘛教我日本時代形成的俗語：「第一戇，替人選舉運功；第二戇，種甘蔗給會社磅；第三戇，吃煙歕風；第四戇，哺檳榔吐紅。」我感覺真趣味。因為有這款環境甲因緣，我對台灣俗諺特別喜愛。今仔日，有機會用台語演講「選舉語言與台灣俗諺」，親像「魚勿仔魚食著皇帝肉──暢甲無鰾」。

以上，拉拉雜雜，敬請逐家多多指教。俗語講「一句話三尖六角，角角傷人」，若有講了無得當的所在，也請逐家多多包涵。今仔日，「有食佫有掠」，真感謝！感謝大家！