註：六月九日晚於（北區海霸王）為史明先生祝壽餐會上的致詞預備稿

小漢ê時陣，我ê「多桑」教我講：「奴僕眼中無英雄」。為什麼？「准講是le服伺Napoleon ê奴才，伊看到Napoleon原在需要放尿，「合我仝款」，就勿會尊敬伊了。

大漢了後，我ê理解復（qoh）深一層。尻梢人（ka sau lang）無骨氣，簡單著予人收買，叫是別人和伊仝款尻梢，仝款無骨氣，好收買。所以，di奴隸民族內面是無英雄ê。如果一ê人，伊ê字彙內無英雄一字，伊一定是奴隸，是奴化教育ê犧牲者、收益者。

所以我從來就是一ê英雄崇拜者，我崇拜胡志明，崇拜Che Guevara。也崇拜過真濟原來不是英雄ê假英雄。

di台灣，事實非常明顯：媒體主流，控制在中國人ê手中，　是「反台灣ê」，也就是「反人民ê」。這種主流媒體就是消蝕毀滅台灣英雄ê最有力ê機制。

時代真無仝：古早時，英雄是威武不屈，貧賤不移，富貴不淫。現主時，卻是需要加一條：看伊和媒體ê關係！一ê人，歸日享受做媒體ê寵兒，真可憐，伊bè an juà做英雄？伊就沈淪墮落，變做八掛香爐教徒！英雄氣概是氧氣，媒體寵愛卻是一氧化碳，後者可以取代前者，這種取代力有千倍萬倍強，一時a就「腦死」了，像施明德，即嘛你完全看未出，伊和許信良、陳文茜、趙少康、李敖、黃義交、周玉蔻、楊照、宋楚瑜、馬英九、龍應台、謝啟大，有什麼無仝款！媒體寵兒攏總是八掛香爐教徒，最多是分壇不同而已。

今a日ê壽星，當然是中國媒體絕口不提ê人。史明一ê名，對　來講，就是台灣，就是上恨上驚ê名詞。

史明先生是lan真正ê台灣人崇拜ê英雄。當然，伊ê革命志業，到今抑未成功。但是，一ê真正romantique ê革命英雄，永遠樂觀：路向正確，總有行到ê一工。lan大家di jia，仝款傳染著喜氣，仝款傳染著史明先生ê英雄意氣！